થોડાં નવા ઇન્દ્રધનુષ

Why Me?

બહેરાશના ગણતંત્રમાં પડઘાઉ છું હજી
કૈં કેટલા આરોપસર ચીંધાઉ છું હજી
- મિલિન્દ ગઢવી

Looking For Lights

ક્યાંથી જન્મ્યો છે આવો ખંત મને?
કોઇ ભીતર મળે જ્વલંત મને!
- મિલિન્દ ગઢવી

A Face In The Crowd

એક પથ્થર છું હું પ્રતીક્ષાનો
સ્પર્શ ઢોળી કરો જીવંત મને!
- મિલિન્દ ગઢવી

Timeless Like A Rock

એટલે થઇ જવાયું બેપરવા
ફર્ક પાડે ક્યાં આદિ-અંત મને?
- મિલિન્દ ગઢવી

A Spider On Its Web

હું ય જાળું કરોળિયાનું છું
રોજ રાખે છે તંતોતંત મને!
- મિલિન્દ ગઢવી

Fragrance

નામ મારું 'સુગંધ' પાડીને
કોણ કરતું ગયું અનંત મને?
- મિલિન્દ ગઢવી

My Words have Become Orange

રંગ ભગવો ખર્યો ગઝલમાંથી

લોક સમજે ન ક્યાંક સંત મને!

- મિલિન્દ ગઢવી

તાજા કલમ...

મૃત્યુદંડ

પછી એણે લખ્યું
"જિંદગી!" -
ને આ આશ્ચર્ય ચિહ્ન (!)
જાણે કે જિંદગી નો
પર્યાય બની ગયું

પછી એણે લખ્યું
"પ્રેમ" -
ને એની વ્યાખ્યા કરતાં કરતાં
એક આખી જિંદગી નિકળી ગઇ

પછી એણે લખ્યું
"હું અને તું" -
ને આ 'અને' જેટલું અંતર
અમારી વચ્ચે
કાયમ રહ્યા કર્યું

પછી એણે લખ્યું
"વિરહ" -
ને
કલમની ટાંકણીને
ટેબલ પર જોરથી દાબીને
તોડી નાખી

કોઇ જજ જેમ
મૃત્યુદંડ લખ્યા પછી કરે ને
એમજ...!!!

- મિલિન્દ ગઢવી